CAGAYAN DE ORO CITY – Subli nangayo’g pasaylo si Misamis Oriental Peter Unabia atubangan sa religious leaders nga inisyatiba sa Archdiocese of Cagayan de Oro kaganihang buntag.
Kini human tambungi ni Unabia kuyog ni Misamis Oriental District 2 Rep. Bambi Emano ang interfaith dialogue diin anaa ang tag-as nga lideres sa nagkadaiyang simbahan nga naglakip sa mga igsoong Muslim nga adunay gibating kahiubos kaniya sa sukad pa sa miaging semana.
Sa tumang pagpaubos ug pagpakita sa iyang pagdawat sa kasaypanan,kinasingkasing kining nangayo’g pasaylo sa Muslim community leaders sinaksihan nila ni Archbishop Jose Cabantan, Archbishop Emeritus Antonio Ledesma ug Bishop Felixberto Calang sa IFI Diocese of Cagayan de Oro sa Archbishop Palace sa simbahang Katolika kaganihang buntag.
Nahimong undanon ang panagkukabildo sa mga panig nga anaa sa maong dayalogo sanglit gitumong man ang panagtagbo nga makakab-ot sa panag-uli sa mga nasilo nga mga pagbati.
Una nang natandog ang pagbati sa Muslim community sa Mindanao kay nahisgutan ni Unabia sa iyang pagpangampanya ang pipila ka panghitabo sa Bangsamoro region ug naghatag sa dili maayong kahulugan sa mga nakadungog niini.
