CAGAYAN DE ORO CITY – Wala na gikakurat sa mga grupo sa drayber ug pipila ka individual traditional jeepney operators ang pagbasura ni Pres Bongbong Marcos sa resolusyon nga pirmado sa 22 ka senador pag-oktaba sa kasamtangang gipatuman nga modernization program sa public transporation sa nasud.
Kini human unang nalipay ang pundok ni United Drivers Association Pres Joel Gabatan nga gipaboran ug gisang-ata’g resolusyon sa mga senador ang hangyo sa MANIBELA ug PISTON nga palawman ang pagtuki sa maong programa.
Namahayag si Gabatan nga dakong kawad-on sa duha ka panig ang pagdumili ni Marcos nga paminawon ug konsiderahon ang hangyo sa MANIBELA ug PISTON.
Siya miingon nga taas nga proseso ang angay unta sundon sa maong progama apan mas giuna sa Department of Transportation o DOTr ang franchise consolidation nga nagpihig sa traditional jeepney operators tibuok nasud.
Hisayrang anaa sa 87 porsiento tibuok nasud ang naporma nga transport cooperatives nga hugpong sa mga operator ug draybers samtang sobra 13% na lang pabiling wala pa nagpa-franchise consolidation.
