CAGAYAN DE ORO CITY – Gihingusgan ni Regional Peace and Order Council chairman City Mayor Oscar Moreno nga mapaubos sa unified community quarantine ang syudad ingon man ang Misamis Oriental ug lima ka lungsod sa Bukidnon.
Kini sa tuyo nga unipormado ang lakang nga himoon sa matag-local govt units aron dili masudlan sa positibo kaso sa coronavirus disease ang maong mga lugar.
Kini ang hinungdan nga nagtagbo ang lain-laing sektor diin gituki ang sundon ug gamiton nga gabayan sa unified community quarantine nga ipatuman sa labing dali nga panahon.
Samtang naka-status quo o wala una gipatuman ni Moreno ang iyang mando ehekutibo diin nagpaubos sa syudad sa community quarantine.
Kini aron sa tinguha nga malimitahan ang lihok sa katawhan ug ang pagsulod sa mga tawo nga walay klaro nga katuyuan sa syudad samtang pugngan magpaton sa positibong kaso sa coronavirus disease o COVID-19.
Miingon si Moreno nga una niya ihinayak ang pagpatuman niini samtang wala pa maporma ang mga gabayan nga sundon sa Misamis Oriental ug Bukidnon alang sa tinguha nga unified community quarantine batok sa maong bayrus.
Samtang nakataya ang kaluwasan sa katawhang Pilipinhon rason nga angay lamang paluyuhan ang maayong tinguha nga magbaton sa unified community quarantine ang tulo ka lugar sa Northern Mindanao.
Kini ang kusganong pagsuporta ni Gov Bambi Emano sa tinguha ni Moreno diin nakataya ang seguridad sa katawhan batok sa coronavirus disease o COVID-19 nga dakong hadla sa rehiyon.
Miingon nsi Emano nga kini ang rason nga gipadala niya ang iyang mga representante aron ipadayag usab ang kagustuhan sa probinsya nga makatabang sa kaluwasan sa publiko batok sa maong sakit.
