GIPANGHULAGWAY sa United Peoples Initiative nga dili lamang 18-ka mag ex marines apan hapit 100 ka mga delivery man ug bodyguards ang nalambigit sa pagdeliver og male-maletang salapi ngadto sa mga kongresista.
Matod ni Capt. Rey Valeros Jr. sa UPI, importante kaayo ang pagbulgar sa 18 ka kanhi Marino tungod kay aduna sila’y personal nga kaalam ug kasinatian nga makahatag og klaro sa tinuod nga panghitabo.
Gidugang pa ni Valeros nga usa kini ka maayong higayon aron ipakita nga adunay gitago ang gobyerno, ug naghatag kini og dakong pangutana sa publiko human nga wala kini ma-cover sa pipila ka media outlets.
Giingon sa grupo nga ang transparency ug accountability kinahanglan ipatuman aron malikayan ang susamang kalihokan sa umaabot.
Nagpadayag usab sa kadismaya si Valeros tungod kay nagpakita lamang ang maong hitabo nga aduna gihapon mga media outlets nga mabayaran lang o mapahilom, ug nagpadayag kini sa kakulang sa independensya ug integridad sa uban nga balita sa nasud. (James Oliver)
