CAGAYAN DE ORO CITY – Gusto madunggan sa katawhan nga hisgutan ni Pres Bongbong Marcos sa iyang ikatulo nga State of the Nation Address o SONA kon unsay labing maayo nga buhaton aron proteksyonan ang interes Pilipinas sa West Philippine Sea nga giangkon sa China.
Kini alayon sa nakahan-ay nga obligasyong mohatag ni Marcos sa tinuig nga pagtaho sa katawhan sa iyang nabuhat,buhaton ug plano nga buhaton samtang anaa sa katungdanan.
Miingon si CWGG 10 convenor Atty Antonio Soriano nga gusto usab madunggan sa katawhan kon unsay tin-aw nga lakang ni Marcos batok sa taas nga inflation rate,sistema sa edukasyon ug pakig-kontra batok sa naghitak nga kurapsyon sulod sa kagamhanan.
Himoon ang SONA ni Pres Marcos sa Batasang Pambansa dungan sa pagbalik sa mga magbabalaod diin mag-joint session ang mga kongresista ug mga senador alayon niini sa Hulyo 22.
Samtang natuki na’g sugod sa command group sa Police Regional Office 10 ang ipatuman nga security plan alang sa 3rd SONA ni Pres Bongbong Marcos sa ikaupat nga Lunes sa Hulyo ning tuiga.
Kini ang gibutyag ni PRO 10 spokesperson Major Joann Navarro nunot sa ilang implementation security plan nga ipakatag sa tibuok rehiyon sa maong adlaw.
Namahayag si Navarro nga bisan nagpabiling hapsay ug malinawon ang Northern Mindanao matag-lusad sa SONA sa pungko nga presidente,apan walay ihatag nga kumpiyansa sa state forces pag-abot sa isyu sa seguridad.
Dumduman nga sukad nakalingkod si kanhi Pres Rodrigo Duterte pagka-presidente nga nasundan ni Marcos,mihinay usab ang anti-SONA rallies sa mga probinsya nga naglakip dinhi sa rehiyon.
