Muabot sa upat ka balay ang naapektuhan sa sunog nga miulbo sa Dama de Noche, Adela, Barangay Camaman‑an kagahapong adlawa diin usa ka tigulang ang namatay sa maong trahedya.
Sumala ni Barangay Camaman‑an Kagawad Alicia Cabili, tulo ka balay ang totally burned samtang usa ang partially damaged, nga nakaapekto sa unom ka pamilya nga adunay kinatibuk‑ang 17 ka indibidwal.
Giila ang namatay nga si Eddie Del Rosario, kapin 80 anyos, nga gituohang nasuffocate sulod sa iyang balay human wala makagawas sa nagdilaab nga panimalay.
Matod pa ni Cabili, una nang nakagawas ang biktima apan mibalik sulod sa balay aron mokuha og butang hangtod na‑trap sa kusog nga kalayo ug wala na makalingkawas.
Samtang padayon pa ang imbestigasyon sa Bureau of Fire Protection, misaka sa ikaduhang alarma ang sunog ug gibanabana nga midamyos og kapin ₱125,000.Nagpadayon karon ang barangay sa pagtabang sa mga apektadong pamilya pinaagi sa inisyal nga ayuda ug uban pang suporta.
