Duha ka sunog ang natala sa syudad sa milabay’ng 24 oras. Ang unang sunog midamyos sa kapin 150-mil pesos sa Gaabucayan-Corrales Extn, ning syudad, bandang alas 10 sa buntag.
Gibutyag ni Bureau of Fire Protection – Lapasan Substation Fire Investigator Jesrelle Lazaga nga misaka pa sa ikaduhang alarma ang sunog human upat ka balay ang tibook nga nalamoy sa kalayo ug usa ang natala nga samaran.
Ang unang balay nga nasunog gipanag-iya ni Salvador Omega, 60 anyos.
Naka-angkon ang biktima sa first degree burn sa wala ug tuo nga li-og ug nadala sa balaytambalan.
Ang laing tolo ka balay nga totally burned gipanag-iya nila Wilbert Uy, ug wala pa maila ang nanag-iya sa na-angin nga tindahan ug junk shop. Wala pay lead ang mga otoridad kung unsa ang hinundang sa sunog.
Sa pikas bahin, lima ka balay ang hurot ka ugdaw sa dakung sunog sa Lambago Brgy Lapasan, bandang alas 11 sa buntag.
Gibutyag ni Fire Senior Inspector Louis Roy Solano nga mubata sa 130-mil ang damyos sa sunog. Hinoon, walay tawong samaran o namatay sa ikaduhang sunog.
Una niini, nagkalisud ang BFP sa pagsulod sa area tungod sa kapi-ot sa dalan ug kusog nga hangin hinungdan nga paspas ang pagtabok sa kalayo.
