CAGAYAN DE ORO CITY – Naghikog-patay pinaagi sa pagsunog sa kaugalingon ang wala pa maila nga biktima diha sa Rotunda sa Brgy Macasandig ning syudad karong hapon lamang.
Kini human migamit sa gitoohang gas ang biktima nga gibubo sa iyang lawas ayha gidugtan gamit ang kalayo gikan sa lighter.
Miingon ang testigo nga si Alexander Vergara nga taga-Brgy Nazareth ning syudad nga kamulo sila nanguha’g kumpay dihang nakit-an nila ang pagsilaab sa lawas sa biktima.
Gilayong nangayo sila’g tabang sa kapolisan ug CDRRMD aron unta luwason ang kinabuhi sa maong biktima.
Kumbinsido si Vergara nga hikog ang motibo sa biktima sa pagkamatay niini.
Samtang giimbestigaran karon sa kapolisan kon kinsa ang biktima nga nagsunog-patay sa kaugalingon gamit ang gas diha sa Rotunda,Brgy Macasandig ning syudad.
Kini human maglisod pag-ila ang kapolisan sa maong tawo nga napaig sa grabeng pakasunog sa lawas niini.
Miingon si Police Senior Master Sgt Joel Tare sa Macasandig Police Station nga mag-agad sila sa testimonya gikan sa mga testigo nga nakasaksi sa pagkasunog nga buhi sa maong biktima.
