Uban sa pag-classify sa Pilipinas isip upper middle income, nanghinaot ang Bagong Alyansang Makabayan (BAYAN) nga dili unta gamiton sa kagamhanan ang maong status isip rason sa pagpangutang og dugang sa World Bank.
Gipasabot ni Rauf Sissay sa BAYAN nga ang matag utang sa nasud sagad adunay kauban nga mga kondisyon sa pag-implementar og mga programa, sama sa nasinati kaniadto sa K-12, nga naghatag og kabalaka sa padayon nga pagdaghan sa utang sa nasud.
Dugang pa niini, ang kasamtangang utang sa Pilipinas miabot na sa 18 trillion pesos, busa ang dugang pangutang magresulta lamang sa way kahumanang obligasyon sa panudlanan sa gobyerno.
Tungod niini, nanawagan ang grupo nga unta tutokan ang tinuod nga kalambuan alang sa mga yanong Pilipino imbes nga magsalig sa dugang pangutang gikan sa langyaw nga institusyon.
