CAGAYAN DE ORO CITY – Gikompirmar ni Bugo Punong Brgy Vic Talingting nga nagka-stampede ang mga biktima sa baha nga gipangtunula’g tabang sa ilang brgy kagahapong adlawa.
Kini human makuha-i’g video footage ang pagdasok ug pagtinuluray sa mga tawo aron lamang makakuha’g ayuda gumikan sa miigo nga kalamidad sa ilang lugar sa miaging adlaw’ng Domingo.
Miingon si Talingting nga gikulang ang ilang mga tawo sa paghatag seguridad ilabina nga anaa sa lima ka grupo ang nang-apud apod sa in-kind goods ngadto sa daghang pamilya nga nagkinahanglan sa panabang.
Ubay-ubay’ng sona sa ilang brgy ang nasudlan sa tubig-baha diin bana-banang sobra libo ka pamilya ang apektado samtang duha ang kompirmadong namatay sa mga residente niini.
Samtang giawhag sa city govt ang nagkadaiyang grupo nga dunay kasingkasing sa pagtabang sa urban flooding victims nga magbaton sa ensakto nga koordinasyon sa mga brgy nga ilang sudlan ning syudad.
Gihimo ni CSWD overseer Pastor Dimver Andales ang apelar nunot sa stampede nga nahitabo sa mga residente sa Brgy Bugo samtang midawat sa mga ayuda gikan sa nagkadaiyang grupo.
Miingon si Andales nga importante ang komunikasyon sa matag-panig ilabina nga nagkinahanglan sa mga personahe sa brgy ug mga otoridad ang susamang kalihukan aron kalikayan ang kagubot.
Hinoon sa maong stampede sa Brgy Bugo,walay bisan usa ka residente ang nataho na namatay o samaron kagahapong adlawa.
