Nadamay na ang ubang Arab countries sa gihimong pagbomba sa Amerika ngadto sa tulo ka nuclear facilities sa Iran.
Kini human bombahi sa Iran ang basi-militar nga iya sa Amerika nga Al Udeid Air Base nga nakabase sa Doha City, Qatar ingon man ang Iraq.
Kini nga lakang sa Iran ang silbing balos batok sa mando ni US Pres Donald Trump nga pagpabusikad sa ilang mga pasilidad sa pagmugna sa niyukliyar niadtong adlaw’ng Domingo.
Wala pa’y gikataho nga adunay mga namatay’ng tropang Kano sa pagpangatake sa Iran sa mga kaalyado sa Amerika sa tunga-tungang sidlakan.
Gilayon usab nga gikondinar ug gibatikos sa Kingdom of Saudi Arabia ang binuhatan sa Iran ngadto sa ubang Arab nations.
Dugtong niini,gipangsirad-an na sa ubang kanasuran ang mga nag-unang airport aron walay tugtan nga mga eroplano makalupad gumikan sa kadelikado sa kahimtang.
Dumduman nga nagsugod ang suliran sa Middle East nunot sa pag-atake sa Israeli forces sa nuclear facilities sa Iran sa milabay’ng semana nga nag-resulta sa pagbinalusay sa duruha gamit ang mga bomba diin miapil ang puwersa sa Amerika.
