CAGAYAN DE ORO CITY – Sudlan na sa presensiya sa mga sundalong Amerikano ang rehiyon sa Northern Mindanao partikular dinhi sa dakbayan.
Kini human tugti ni Pres Bongbong Marcos nga tipik ang Cagayan de Oro City sa dugang upat ka bag-ong lokasyon alang sa Enhanced Defense Cooperation Agreement o EDCA aron mapalig-on sa Pilipinas ug Estados Unidos ang seguridad ug ubang panginahanglan sa duha ka panig.
Gihimo ni US Defense Secretary Lloyd Austin III ang anunsyo nunot sa iyang pakigkita kang Marcos ug Defense Secretary Carlito Galvez Jr.
Dugang ni Austin nga itukod ang EDCA facility sa kanhi Lumbia Domestic Airport nga nagsilbing tactical operations group sa Philippine Air Force diha sa Brgy Lumbia ning syudad.
Una usab niini,gipasabot ni Marcos nga gikinahanglan sa Pilipinas ang maong programa subay sa unod sa EDCA.
Ang pagdugang sa EDCA locations,ang tipik usab sa paglig-on sa puwersa sa Pilipinas tungod sa isyu sa West Philippine Sea nga giangkon sa China dinhi sa Asya.
Dugtong niini,gilayong makigkita si Galvez kang City Mayor Rolando ‘Klarex’ Uy ug ubang kadagkuan sa national govt agencies nga dunay mga buhatan dinhi sa rehiyon.
Kini aron hisgutan ang mga gabayan sa pagpatuman sa mga programa ubos sa EDCA nga sinabutan sa Pilipinas ug Amerika.
Miingon si Galvez nga kinahanglanng mapasabot kini’g maayo sa publiko kon nganong gikinahanglan ang presensiya sa tropang mga Amerikano sa syudad.
Hisayrang gawas sa syudad,apil usab sa EDCA ang Antonio Bautista Air Base sa Palawan;Fort Magsaysay sa Nueva Ecija ug Mactan Benito Ebuen Air Base sa Cebu.
