CAGAYAN DE ORO CITY – Gi-depensa sa Mindanaoan congressmen nga nagtanga’g sa acronym nga ‘USE’ ang ilang pag-uyon nga ipaubos sa impeachment proceedings si Vice Pres Sara Duterte sa senado.
Kini human kompirmaha nila Cagayan de Oro 1st District Cong. Lordan Suan;Misamis Oriental 1st District Cong. Christian Unabia ug Misamis Oriental 2nd District Cong. Bambi Emano nga kabahin sila sa 239 ka magbabalaod nga mihatag sa ilang pag-uyon aron ma-endorso ang impeachment complaint sa senado aron taralon ang mga pasangil nga giatubang ni VP Sara.
Namahayag ang USE congressmen nga dili dikta sa politika,kaugalingong katagbawan ug bisan unsa nga bugti pa man ang ilang pagpirma apan kahigayunan nga ilang gihatag kang VP Sara nga makatubag,maka-depensa,makahimakak ug makapasabot batok sa mga isyu nga gipahid batok kaniya sa mga nanumbong.
Giklaro usab sa maong mga kongresista nga dili pagsalikway kang Sara isip Mindanaoan ang ilang pag-uban sa pro-impeachment legislators sukwahi sa gitoohan sa kadaghanan.
Dumduman nga sa 14 ka kongresista gikan sa Northern Mindanao, sila lang ni Cagayan de Oro 2nd District Cong. Rufus Rodriguez;Bukidnon 3rd District Cong. Jose Maria Zubiri ug Lanao del Norte 1st District Abdullah Dimaporo ang wala mohatag sa ilang pagtugot nga ipalagpot sa katungdanan si Duterte.
Hisayrang anaa na sa senado ang maong reklamo ug gihulatan pa kon dunggon ba kini samtang naka-session break sila o pag-abot na sa Hunyo diin posibleng dili na kalihok kay lahi na ang prioridad sa 20th Congress.
