Usec. Castro, gipatin-aw nga bahin sa legal nga proseso ang extradition warrant batok kang Pastor Apollo Quiboloy

Gipatin-aw ni Palace Press Officer Undersecretary Claire Castro nga bahin lamang sa gitakdang legal nga proseso sa extradition ang pag-isyu sa warrant of arrest batok kang Pastor Apollo Quiboloy.

Ang maong warrant giisyu sa Makati Regional Trial Court (RTC) Branch 145 niadtong Nobyembre 12, 2026, human makakita ang korte og probable cause kalabot sa hangyo sa gobyerno sa Estados Unidos nga i-extradite si Quiboloy ug ang duha pa niyang kaubanan.

Matud ni Castro, normal nga lakang sa extradition proceedings ang pag-isyu sa maong warrant bisan pa nga anaa na sa kustodiya sa mga otoridad si Quiboloy tungod sa lahi niyang mga kaso sa Pilipinas.

Gipatin-aw usab niya nga walay kalabotan sa pag-abot ni US President Donald Trump sa Pilipinas ang pag-isyu sa warrant ug sulagma lamang nga natunong kini sa iyang pagbisita, tungod kay dugay nang gisusi sa mga otoridad ang daghang dokumento sa wala pa mapasaka sa Department of Justice (DOJ) ang extradition petition alang sa gobyerno sa Estados Unidos. (raniel mahunyag)