Gihatagan og kabug‑aton ni Julie Mae Maisog‑Robles, psychiatric nurse sa House of Hope Foundation Inc., ang kaimportansya nga ang matag tawo adunay financial literacy skills, ilabi na sa panahon karon nga daghan ang nag‑antos sa problema sa utang ug kalisod sa pinansyal.
Matod ni Maisog‑Robles, ang sobra nga kabug‑at sa utang mahimong mosangpot sa depresyon, anxiety, ug sa ubang kaso mahimong magdala pa gani sa suicidal thoughts tungod sa pressure sa pagbayad ug padayon nga paningil.
Dugang pa niya, daghang indibidwal ang nakasinati og kahadlok sa adlaw‑adlaw nga kinabuhi sama sa paglikay sa tawag, pagtago sa sitwasyon, ug kakulang sa tulog tungod sa stress sa utang.
Gipasabot usab niya nga importante ang pagkinabuhi sulod sa kaya sa kita, paglikay sa dili kinahanglan nga paggasto, ug pagpalig‑on sa disiplina sa pinansyal aron malikayan ang pagkalubog sa utang.
Tungod niini, gi‑awhag ni Maisog‑Robles ang publiko nga magbantay sa ilang pinansyal nga kahimtang ug mangayo og tabang kon ang problema sa kwarta magsugod na og epekto sa mental health.
