Giatubang karun ni Meta Platforms, Inc. CEO Mark Zuckerberg ang usa ka landmark trial sa Los Angeles nga nag-akusar sa mga social media platform nga gituyo kuno nga mahimong adiksyon sa kabatan-onan.
Sa iyang testimonya, gipatin-aw ni Zuckerberg nga wala siya magmando sa kompanya nga palugwayan o pasobrahan ang oras sa paggamit sa mga batan-on sa ilang mga plataporma.
Samtang nagpadayon ang kaso, giingon usab nga adunay laing reklamo batok kaniya nga may kalabotan gihapon sa alegasyon sa social media addiction.
Ang maong mga kaso naglangkob sa daghang reklamo gikan sa mga ginikanan ug eskwelahan nga nagtuo nga nakaapekto sa kahimsog ug panginabuhi sa kabatan-onan ang paggamit sa social media, ilabi na sa mga plataporma sa Meta sama sa Facebook ug Instagram. (Phillip Ariata)
