CAGAYAN DE ORO CITY-Gihulatan sa National Bureau of Investigation o NBI-10 ang resolusyon nga ipaggawas sa city prosecutor’s office sa kasong gipasaka batok sa 23-anyos nga suspected online scammer ning syudad.
Miingon si Si NBI-10 head agent Alex Caburnay nga ila nang napasaka sa piskalya ang kasong syndicated swindling nga may kalabutan sa cybercrime law batok kang Antonette Pacana Sestoso nga taga Brgy Kauswagan ning syudad.
Sa ebidensya nga gihuptan ni Caburnay,anaa sa minilyong salapi ang giingong nabulsa ni Sestoso pinaagi sa iyang “1K Turns 1,700 IN 10 DAYS online investment scam” gikan sa iyang gatusang investors.
Nagpahimangno usab si Caburnay sa publiko nga adunay walo ka online scammers ang ilang gibantayan nga susama’g istratehiya kang Sestoso.
Samtang gi-awhag ni NBI regional director Atty Patricio ”Pipo” Bernales ang mga nabiktima sa online investment scam nga dili maulaw moreklamo sa ilang buhatan.
Siya miingon nga dili nila masulbad ang mga kaso sa pagpangilad kon walay reklamo nga madawatan ang ilang ahensiya.
Subli usab nga gipahimangnuan ni Bernales ang publiko nga magbinantayon sa sudlan nila nga negosyo aron dili mabiktima sa mga mangingilad.
Gihimo ni Bernales ang maong panawagan nunot na sa rebelasyon ni NBI-10 head agent Alex Caburnay nga adunay walo ka online scammers ang ilang gibantayan nga susama’g estilo sa 23-anyos nga suspected online scammer nga si Sestoso.
Samtang malaumon ang mga biktima sa 1K Turns 1,700 IN 10 DAYS nga mauli kanila ang ilang kwarta nga gibubo sa maong online scam ning syudad.
Gisaysay sa usa sa mga biktima nga si alyas Stephanie nga sa unang investment niini nga kantidad nga 25-mil pesos kang Sestoso,natinuod nga na-doble ang iyang kwarta rason nga giaghat niya ang iyang mga paryente ug higala nga moapil usab.
Miabot sa tunga sa milyon pesos nga salapi ang gipaabot ni Stephanie nga mabalik ngadto kaniya.
Si Stephanie ang kabahin sa tulo ka investors nga unang mikaso’g syndicated swindling nga may kalabutan sa cybercrime law batok kang Sestoso.
Samtang nabalaka ang ginang nga usa sa mga investor sa 1K Turns 1,700 IN 10 DAYS online investment scam nga mabungkag ang pamuyo niini ngadto sa iyang pamilya.
Kini human mibati’g sobra kasuko ang bana ni alyas Melinda tungod sa dakong iskandalo nga nahitabo sa pag-invest sa ilang salapi sa usa ka Sestoso diin anaa sa 1.5 milyon pesos ang nabubo nga investment capital.
Namahayag si alyas Melinda nga dili masabot ang ilang gibati tungod sa hitabo diin kini nag-problema unsaon pagbayad ang iyang investors nga nakahatag sa ilang investment capital.
Dugtong niini,gipasalig sa ni Sestoso nga bayran ang tanan niyang nakuhaa’g salapi gamit ang 1K Turns 1,700 IN 10 DAYS online investment scheme.
Kini human unang gisulong sa gatusang investors si Sestoso dihang nabulgar nga naglisod na’g hatag sa cash pay outs sa miaging semana.
Miingon si Sestoso kinsa detinado sa NB-10 nga kaya niya bayran ang minilyong invesment capital sa mga miyembro sulod sa upat ka bulan.
Namugos kini nga may lain pang mga tawo nga angay usab gukdon kon nganong nahugno ang online investment nga iyang gitukod.
