CAGAYAN DE ORO CITY – Gipaniguro ni City Mayor elect Rolando ‘Klarex’ Uy nga dili makawang ang gisalig nga kumpiyansa sa katawhan kaniya aron idumala ang mga kalihukan sa city hall ilabina ang panudluan sa panalapi sa dakbayan.
Kini ang garantiya sa umaabot mayor samtang mohulip sa ibakanteng puwesto sa iyang kaalyado nga si outgoing City Mayor Oscar Moreno sa Hunyo 30 ning tuiga.
Apan miingon ang outgoing 1st district congressman nga dili mahimo nga biyaan kini sa katawhan sa iyang pag-atubang sa mga suliran ilabina nga grabeng naigo sa pandemya sa COVID-19 ang dakbayan.
Samtang gihagit ni Uy ang dept heads ug ang rank & file city employees nga pamatud-an ang ilang katakos sa trabaho bisan kon kutob na lang si Morneo sa Hunyo 30.
Kini tungod kay dili magpanuko si Mayor Klarex pagkuha’g balik sa maong mga empleyado kon angayang ipabilin sa trabaho ug walay mga kalapasan sa patakaran sa gobierno.
Siya miingon nga hatagan niya’g usa ka semana ang dept heads samtang usa ka bulan ang job orders ug casuals aron pamatud-an nga angayan pa sila kuhao’g balik sa bag-ong administrasyon.
Sa pikas bahin,miani sa suporta sa pipila ka sakop sa minoriya sa umaabot nga 20th council ang sugyot ug hangyo ni Uy nga hataga’g konsiderasyon ang mga negosyante nga makasulbad sa ilang mga obligasyon sa dakbayan.
Kini human unan gisulti ni Uy nga dili niya pabug-atan ang mga negosyante tungod sa grabeng epekto sa pandemya sa dakbayan.
Miingon si incoming city councilor Atty James Judith nga kuyog siya sa maong krusada sa umaabot mayor kon ikaayo kini sa katibuk-an.
Una nang misuporta usab si Judith nga hataga’g amnestiya ang mga drayber nga daghan traffic violations ning syudad.
