CAGAYAN DE ORO CITY -Isugyot sa City Health Office ngadto kang City Mayor Rolando ‘Klarex’ Uy nga ibalik ang kahugot sa minimum health standards nga duha ka tuig nga napatuman batok COVID-19 sa dakbayan.
Kini gumikan sa pagsaka’g balik sa mga kaso sa mga tawo nga naigo sa virus infection sa syudad.
Miingon si Dr. Joselito Retuya,city epediomologist nga nausik lamang ang paningkamot ug sakripisyo sa medical frontliners tungod sa sobra kaluag nga alert level nga gipatuman sa IATF.
Sukad nasudlan sa bayrus ang dakbayan,sobra 900 ka tawo na ang nakabsan sa kinabuhi.Samtang sa pikas bahin,misaka sa 111 percent ang pagsaka sa kaso dengue sa dakbayan sulod ning tuiga.
Gibutyag ni City Health Officer Dra Richelle Delia nga anaa sa 692 ka kaso sa dengue ang natala ning tuiga itandi sa 327 lamang sa susamang period sa 2021.
Gani,miingon si Delia nga sulod lamang sa Hunyo ning tuiga anaa sa 10 ka tawo na ang namatay nga naggikan sa mga barangay sa Gusa,Balulang,Camaman-an,Balubal,Patag,Bulua ug Carmen ning syudad.
Dugtong niini,gihangyo sa CHO ang mga kapitanes nga i-aktibo’g balik ang mga gabayan nga pangontra sa mga lamok nga nagdala sa dengue.
