CAGAYAN DE ORO CITY-Gibaharan ni Regional Asst State Prosecutor Merlynn Uy ang nabiling prosecutors sulod sa city prosecutor’s office nga likayan ang subli pagkahitabo sa kontrobersyal nga isyu sa ‘case fixing’ sa syudad.
Gihimo ni Uy ang pasidaan tungod sa pagka-relib niini sa pagka-officer-in- charge kay gihulipan ni Pangasinan Provincial Prosecutor Abraham Ramos.
Si Uy miingon nga apektado pag-ayo ang imahen sa ilang buhatan sa dihang nasapon pinaagi sa entrapment operation sa CIDG-10 ang empleyado nga si Genard Abejo nga nangilkil sa pipika ka ginikanan bugti sa pagpagaan sa mga kaso sa ilang mga anak.
Naresolbar na karon sa piskalya ang nagpatapun-og nga mga kaso nga unang natanggong sa taas-taas nga higayon sa syudad.
Kini human nadiskobre ni Uy nga daghang kaso nga napasagdan lamang sa taas nga panahon.
Si Uy miingon nga ganado mag-trabaho ang mga prosecutor ilabina kon daghan ang inquest proceedings sa mga dinakpan ilabina sa aspeto sa ilegal drugs nga mga kaso.
