CAGAYAN DE ORO CITY – Gitambagan ni City Election Officer Atty Rowell Valledor ang tanang partido ug supporters nga mo-abante na alang sa sunod nga hugna sa ikaayo sa katawhan sa dakbayan.
Gihimo ni Valledor ang mensahe dungan sa opisyal nga pag-deklarar nga mananaug isip sunod nga mayor kang Cagayan de Oro 1st District Rep Rolando ‘Klarex’ Uy,vice mayor elect Kag Bebot Rodriguez,Kag Lordan Suan isip bag-ong kongresista sa primiero distrito ug ang pagkasubli-i ni segundo distrito incumbent Deputy House Speaker Rufus Rodriguez sa city board of canvassers sa city council kagahapong adlawa.
Miingon si Valledor nga mas maayo nga magsilbing kabahin sa solusyon sa daghang suliran sa dakbayan kaysa modugang sa mga problema.
Sa 372-mil 293 nga botante sa syudad,nakuha ni Klarex ang 150-mil 312 votes aron sakmiton ang kadaugan batok kang kanhi Phividec administrator Jose Gabriel ‘Pompee’ La Viña.
Samtang mi-apelar si Uy sa iyang mga nakaabtang partikular sa mga kandidato gikan sa pikas partido nga maghiusa alang sa pagsilbi sa katawhan sa dakbayan.
Gihimo sa kongresista ang apelar nunot sa iyang pagka-proklamar isip bag-ong mayor sa dakbayan sa miaging May 9 elections.
Gibutyag ni Klarex nga angayang hinay-hinayon na ang pagdawat sa kasamtangang kahimtang ug isalikway ang pagkabahin-bahin aron mas makab-ot pa ang dugang kaugmaran sa syudad.
