CAGAYAN DE ORO CITY – Gitubag na ni Cagayan de Oro 2nd District Cong.Rufus Rodriguez ang unang pahayag ni City Mayor Rolando ‘Klarex’ Uy nga sila maghiusa na pag-alagad sa katawhan sa dakbayan.
Kini bisan kon managlahi ang ilang kagikan sa politika sa milabay’ng piliay.
Namahayag si Rodriguez nga higayon na nga angay ihatag sa iyang pamilya ang ilang suporta sa liderato ni Uy.
Kini nunot usab sa walay puas nga suporta sa mayor sa mga gipangayo’g pabor ni City Vice Mayor Jocelyn ‘Bebot’ Rodriguez kinsa igsoon sa kongresista.
Dugtong niini,gipasalamatan ni Uy ang dayag nang paghisgot ni Rodriguez sa ilang panag-hiusa sa politika.
Siya miingon nga sa Setyembre ning tuiga pa unta nila dungan nga ipadayag ang alyado nila sa politika sa Rodriguezes apan napasayo sa mismong bawarte niini sa Barangay Carmen.
Una nang nanghatag cash- ayuda si Rodriguez sa mga taga- Carmen diin saksi sila Abamin Congressman Atty. Maxie Rodriguez, Vice Mayor Bebot;Kapitan Atty. Regine Rodriguez ug ang tibuok konseho ni Punong Barangay Kikang Uy kaganihang buntag.(Pictures:Kim Zaldivar)
