CAGAYAN DE ORO CITY – Gibatikos ni kanhi City Mayor Oscar Moreno ang nahugon-hugon nga revamp o paglahugay sa mga manager sa pipila ka departamento sulod sa city hall ning syudad.
Kini human unang namulong sa makadaghang higayon si City Mayor Rolando ‘Klarex’ Uy nga angayan niya buhaton ang re-shuffling aron mahulipan ang non-performing department managers nga dakong babag sa iyang pagpatuman sa mga programa sa dakbayan.
Miingon si Moreno nga kaugalingong interes lang ni Uy ang iyang gihuna-huna hinungdang gihinadlok niini ang mga empleyado sa city hall aron mahimong sipsip kaniya.
Samtang dili makapausab kang Uy ang batikos ug pagsaway sa iyang kanhi alyado sa politika nga si Moreno kabahin sa pagpadagan sa city hall.
Namahayag ang mayor nga dakong bakak ang pasiatab sa kanhi mayor kay bugtong gusto lamang niya nga magtinarong sa pagtrabaho ang mga empleyado ngadto sa katawhan sa dakbayan.
Siya miingon nga sobra na usa ka tuig nga gihatag niya sa kasamtangang mga ulo sa departamento hinungdang ipatuman na niini ang paglahugay sulod ning bulana.
