(Update) CAGAYAN DE ORO CITY – Gilayong gibalibaran sa korte ni Regional Trial Court Branch 18 Presiding Judge Giovanni Alfred Navarro ang motion to lift petition nga gidason ni Misamis Oriental Governor Juliette Uy sa 20-day temporary restraining order/TRO nga iyang gihatag sa Sangguniang Panlalawigan ubos ni Vice Govenor Jigjag Pelaez.
Kini human walay nakit-an nga bug-at nga basehan ang korte o walay igong mirito ang mosyon rason nga napalig-on ang TRO batok sa prohibition petition MisOr-SP batok sa gipatuman sa kapitolyo ngadto sa mga empleyado nga over-the counter salary scheme.
Una niini, gi-kuwestiyon sa grupo ni Pelaez kung nganong kinahanglan pa nga maghago ang mga empleyado sa pakig-atubang ug pakighimamat sa gobernadora ayha makuha ang ilang suluhan.
Kini ang rason nga gidangop nila sa korte aron kuwestiyonon ang maong kamanduan diin sila nahatagan sa TRO niadtong Miyerkules.
Apan igo pagkadawat sa buhatan ni Uy sa kopya sa TRO, gilayon sila misang-at sa motion to lift sa korte.
Dumduman nga interbyu sa Bombo Radyo,namahayag si special assistant to the governor Celso Abucejo nga gitahod nila ang hukom sa korte apan nagsang-at sila sa mosyon.
Giklaro usab niini nga limitado lang ang gahom sa TRO kay mga empleyado lang sa SP ang nasulod ug pabiling ubos sa superbisyon ang mga buhatan nga direktang konektado sa gobernadora sa kapitolyo.
