CAGAYAN DE ORO CITY – Gi-absuwelto sa auditing firm ang usa sa upat ka igsoong Yanson nga unang giakusahan nga miwaldas sa dul-ag 400 milyon pesos nga salapi sa kompanyang Vallacar Transit Incorporated nga nakabase sa Negros Occidental.
Kini human nasuta nga walay kalabutan si Celina Yanson Lopez sa pagkawala sa maong salapi nga iya sa kompanya nga nagpadagan sa pinakadakong bus company sa South East Asia.
Namahayag ang Sycip Gorres Velayo o SGV auditing firm nga angay pangitaan sa gilalisang salapi ang kanhi kahera nila sa Manila Purchasing Office nga si Rey Repollo kinsa gitangtang ra usab sa kompanya.
Apelar usab sa magsoon Celina,Emily,Ricky ug Roy Yanson nga unta mabalik na ang maayong relasyon sa ilang pamilya ilabina ngadto sa inahan nila nga si Olivia.
Kini sa tuyo nga mas mapalig-on pa ang ilang pagserbisyo sa katawhan nga nagsalig sa bus units sa lain-laing lugar sa nasud.
Hisayrang giila si Roy nga bag-ong presidente sa mayoriya sa board of directors sa kompanya samtang nagdumili usab pagkanaug si Leo Rey Yanson kay namugos usab kini nga anaa kaniya ang simpatiya gikan sa kadaghanan sa ilang mga empleyado ilabina sa Mindanao.
