CAGAYAN DE ORO CITY – Wala na kasuhi sa mga paryente sa lima ka miembro sa pamilya nga nahurot pagkamatay ang drayber sa cargo truck dihang natigayon ang dugu-ong aksidente sa Brgy Gimangmang,Initao,Misamis Oriental.
Miingon si Police Corporal Ricky Alagon,hepe sa investigative section sa Initao Police Station nga epekto kini sa nakab-ot nga amicable settlement tali sa amo sa drayber sa mga tagtungod sa mga biktima sa maong disgrasya.
Gibutyag ni Alagon nga nasabtan sa mga kabanay sa mga biktima nga aksidente ang hitabo rason nga dili sila intresado mokaso apan mihangyo nga tubagon ang tanang galastuhan sa pagpahiluna sa mga patay’ng lawas hangtod sa paglubong.
Dumduman nga mibangga ang motorsiklo nga gisakyan sa lima ka biktima sa wing van kay mi-overtake gikan sa ilang pagtambong sa family party sa Alubijid,Misamis Oriental.
Hisayrang padulong na manguli sa Brgy Dalamas,Iligan City ang mga biktima dihang misugat ang ngilngig nga aksidente sa semana.
