CAGAYAN DE ORO CITY – Dako ang posibilidad nga mabuhian sa kapolisan ang passenger van driver nga unang detinado nunot sa pagkamatay sa duha ka Misamis Oriental Rural Electric Service Cooperative, Inc. (MORESCO-2) contract workers sa dugu-ong aksidente sa Brgy Buko,Kinoguitan,Misamis Oriental.
Gibutyag ni Major Joann Navarro,tigpamaba sa Police Regional Office o PRO 10 nga kamulo ang negosasyon sa duha ka panig aron makab-ot ang amicable settlement sa hitabo.
Siya miingon nga pulos andam ang panig sa van driver ug sa mga pamilya sa namatyan nga mosulod sa kasabutan.
Dumduman nga nasungag sa multicab ang van hinungdan sa kamatayon sa mga biktima nga sila Joselito Baclayon nga taga-Alubijid ug Joni Tedlos nga residente usab sa Laguindingan ning lalawigan.
Hisayrang anaa sa dul-an 20 ka tawo ang samaron nga gikan sa mga pasahero van ug ang lima nga kauban ni Baclayon nga sakay sa multicab.
