CAGAYAN DE ORO CITY – Giila sa city govt nga dakong oportunidad ug talagsaong higayon nga ikaubang ang Vatican officials nga gipaanhi ni Pope Francis sa Mindanao aron tambungan ang 128th plenary assembly sa Catholic Bishops Conference of the Philippines sa syudad ning semanaha.
Kini human personal gisugat ni City Mayor Rolando ‘Klarex’ Uy sila Vatican’s Secretary of States Archbishop Paul Gallagher ug Papal Nuncio to the Philippines Archbishop Charles Brown sa Laguindingan Airport ayha misaka sa Bukidnon aron makigpulong sa naka-retreat nga 90 ka CBCP bishops.
Namahayag si Janboy Actub,tigpamaba sa mayor nga dakong dungog alang sa katawhan nga sa kadaghang syudad sa Mindanao,gipili sa CBCP nga dinhi himoon ang ilang katiguman.
Dugtong niini,gitapos na sa CBCP bishops ang ilang holy retreat sa Malaybalay City ning adlawa aron makapangandam sa ilang plenary assembly dinhi sa syudad.
Samtang pakanaug na gikan sa ilang holy retreat ang 90 ka arsobispo sa CBCP aron mohimo sa ilang ika-128 nga annual plenary assembly sa usa ka beach resort sa Brgy Cugman ning syudad.
Kini maoy gikompirmar ni Police Maj Jisselle Longgakit,tigpamaba sa Bukidnon Police Provincial Office subay sa iterinary nga nakahan-ay sa dakong kalihukan sa simbahang Katolika dinhi sa rehiyon ning semana.
Namahayag si Longgakit nga dungan nga mobiya gikan sa Transfiguracion Abbey sa Malaybalay City CBCP officials ug duha ka Vatican dignataries diin sila mohapit sa Manolo Fortich ayha modalikyat sa dakbayan.
Siya miingon nga gawas sa close-in escorts sa Catholic officials, naka-position usab ang police road security personnel hangtod makasulod sulod city sa city proper ning adlawa.
