CAGAYAN DE ORO CITY, Philippines – Mapuslan sa gobyerno sa Pilipinas ang paghupot sa orihinal nga Murillo Velarde 1734 Map.
Kagahapon, pormal nga gipresentar sa Malakanyang ang karaan ug labing unang mapa sa Pilipinas nga nagpakita sa kaluag sa teritoryo nga sakop sa nasud.
Masaligon si Presidente Ferdinand Marcos Jr nga mahimong lihitimong ebidensya ang mapa nga gama ni Velarde aron mapalig-on pa ang 2016 Arbitral Ruling sa Maritime Rights sa Pilipinas, ubos sa korte sa United Nations Convention on the Law of the Sea (UNCLOS).
Gisaad ni Marcos nga mapalanog ug mapuslan ang legasiya nga gibilin ni Velarde gamit ang mapa nga musagang sa tanan ilegal nga maritime claims sa China.
