CAGAYAN DE ORO CITY – Taliwala sa mihabol nga kasub-anan sa katawhan nunot sa kompirmasyon sa kamatayon sa magtiayong Ubatay tungod sa landslide,wala kalimti ug gihataga’g pagyukbo ang upat ka search-rescue dogs sa Barangay Palacapao,Quezon,Bukidnon.
Kini tungod sa ilang nahatag nga serbisyo aron hingpit matultulan ang lokasyon diin nalubong nga buhi gumikan sa pagdahili sa yuta ang mga biktima nga sila Elly ug Thelma Ubatay,pulos 60 anyos ug nagpuyo sa lungsod sa Kitaotao.
Sukad gitahasan sa tropa sa 403rd Brigade sa 4th ID ug 10th ID ingon man sa Opol Local Govt unit ang mga iro nga sila Miyuki,Bella,Paul ug Venom sa landslide site, natultulan nila sa hingpit ang mga lawas sa biktima diin paspas gikalot sa backhoe aron mahaw-as kaganihang buntag.
Una migamit sa sniffing dogs ang gobierno sa tuyo nga mapadali ug maluwas unta ang mga biktima sukad ang dahili sa yuta sa milabay’ng Sabado sa gabii apan nabalda ang pagpangita gumikan sa peligro nga dala sa lugar.
Sa talagsaong abilidad nla Miyuki,Venom,Paul ug Bella aron mahatagan sa desenteng haya ug lubong ang magtiayong Ubatay,miani sila sa pagpasalamat ug pagdayeg gikan sa katawhan ilabina sa social media.(Photos from Quezon Municipal Govt).
