CAGAYAN DE ORO CITY – Gilauman nga mabalik na sa South Korea ang kapi’g 5-mil ka tonelada nga basura nga gipalusot sa Verde Soko Philippines nga unang gipatoo nga alang sa pag-recycle diin gitambak sa Sitio Bugwak,Brgy Sta Cruz,Tagoloan,Misamis Oriental.
Kini human gisugdan na ang proseso kon unsaon ang pagsulod sa maong mga basura sa container vans nga dili makahatag kadaot sa ubang kargo kon isakay sa barko sa Mersk Shipping Lines pa Korea sa Oktubre ning tuiga.
Miingon si Mindanao Container Terminal o MCT collector John Simon nga mapadali na ang pagtrabaho niini tungod sa pagtabang pinansyal ug personahe ni Misamis Oriental 2nd District Rep Juliette Uy.
Una niini,subli gibisita ni Simon,Uy,Tagoloan Mayor Enan Sabio ug ubang ahensiya sa gobierno ang garbage site alang sa proto type processing kagahapon sa buntag.
