CAGAYAN DE ORO CITY – Bayran sa kompanyang Verde Soko Philippines Industrial Corporation ang P7.5 million nga pondo alang sa pagpabalik sa nabilin nga 5-mil metric tons nga basura padulong sa South Korea.
Kini human gipasalig sa kompaniya pinaagi sa ilang representante nga si Engr. Niel Alburo nga ang Verde Soko maoy mangulo sa pagpabalik sa mga basura sa maong nasud.
Miiingon si Misamis Oriental Sangguniang Panlalawigan board member Boboy Sabal nga obligasyon sa Verde Soko ang repacking, containerizing ug pag-transport sa basura gikan sa Tagoloan padulong Mindanaonal Container Terminal o MCT ayha ibalik sa South Korea sulod ning bulana.
Samtang gusto ni Mindanao Container Terminal o MCT collector John Simon nga dalion sa Verde Soko Philippines Industrial Corporation ang paghaw-as sa 5-mil ka tonelada nga basura aron ibalik na sa South Korea.
Kini human gipasalig sa kompanya nga sila ang mobayad sa repacking ug paghako sa mga basura gikan sa Tagoloan, Misamis Oriental padulong sa MCT.
Siya miingon nga angayan lamang nga moggasto sa P7.5 million ang kompaniya ilabina nga mao kini ang nagdala’g basura sa Tagoloan, Misamis Oriental.
Dugtong niini, giawhag ni Simon ang Verde Soko nga mahurot paghakot ang mga basura sa dili pa matapos ang bulan sa Hunyo ning tuiga.
Samtang gipasalamatan ni Iligan City Rep Frederick Siao ang Bureau of Customs o BoC sa walay hunong nga kampanya batok imported garbage nga nakasulod sa Misamis Oriental.
Kini nunot na sa sunod-sunod nga pagkadiskubre sa mga basura gikan sa laing kanasuran diha sa Mindanao Container Terminal o MCT ning lalawigan.
Si Siao miingon nga kinahanglang aksyonan kini sa Kongreso tungod kay dako ang iyang pagtoo nga daghan pang kanasuran ang naglaraw nga maglabay sa ilang basura sa Pilipinas.
Nabalaka si Siao nga kun ugaling pasagdan kini nga kaso sa nasud, dako ang posibilidad nga mahimong dumping garbage ang Pilipinas.
Si Siao ang nangunay paghimo’g special report sa Kongreso dihang nadiskobre ang pagsulod sa mga basura sa Verde Soko sa lalawigan sa tuig 2018.
