CAGAYAN DE ORO CITY – Gihagit ni Kongresista Rolando ‘Klarex’ Uy ang kampo ni Kag Jocelyn ‘Bebot’ Rodriguez nga e-prioridad ang pagserbisyo sa katawhan ug angay ihikling ang managlahi nila nga kolor sa politika.
Kini ang unang mensahe sa city mayor elect sa kampo sa oposisyon dungan sa ilang pagka-proklamar isip mga mananaug sa tagsa-tagsa ka posisyon nga gidaganan sa miaging piliay.
Gibutyag sa kongresista nga dili suliran kaniya ang oposisyon sa konseho apan unta kanunay e-prioridad ang interes sa katawhan kaysa ilang tagsa-tagsa ka kaugalingon.
Samtang gipasalig ni Rodriguez nga dili mapihig ang katawhan sa mga batakang serbisyo sa syudad.Kini ang sa konsehal nunot sa hagit ni city mayor elect 1st District Rep. Rolando ‘Klarex’ Uy nga angayang interes sa publiko ang motigbabaw ug dili ang ila sa mga politiko.
Gibutyag ni Rodriguez nga tungod usab sa kadaugan ni Kag Lordan Suan isip kongresista sa unang distrito,mabubu-an pa nila sa dugang mga proyekto ang dakbayan kuyog si Deputy House Speaker Rufus Rodriguez gikan sa segundo distrito.
Dugtong niini,gi-welcom ni incumbent 2nd district ug Deputy House Speaker Rufus Rodriguez ang panawagan ni Uy nga sila maghiusa sa ngalan sa interes sa katawhan sa dakbayan.
Miingon si Rodriguez nga dili problema sa ilang grupo ang maong tinguha kay katawhan man ang rason kon nganong misulod sila sa pag-panerbisyo.
Giawhag usab sa kongresista ang isig ka-kampo nga limtan na ang init nga bangi sa politika sa miaging kampanya ug mag-pokus na sa trabaho.
