CAGAYAN DE ORO CITY – Kaylap sa social media ang walo ka segundos nga video clip diin unod niin ang pagsulod ni interim General Manager Fermin Jarales kuyog ang mga sakop niini sa Cagayan de Oro Water District o COWD sa Corrales Avenue ning syudad.
Gilugwa ang maong video,masud-ong nga paspas ang pagsulod sa mga wala mailing lalaki ug nagsunod si Jarales diin nagkagamitay sa kusog hinungdan naguba ang pultahan sa employees entrance s COWD niadtong Miyerkules Santo sa buntag,Abril 16.
Gani, sa kakalit sa nahitabo nakuratan ang pipila ka mga empleyado sa sulod rason nga adunay pagkayagaw dihang nakaabot kini sa regular management sa COWD nga gipanguluhan ni acting General Manager Engr Edna Najeal.
Dumduman nga kini nga eksena sa video ang tinubdan sa regular mgnt nga gi-ransak sa grupo ni Jarales ang COWD hinungdang adunay mga pulis nga nangabot sa bisinidad niini.
Apan walay natigayong dakop taliwala nga anaa pagka-rekober sa mga dokumento nga gipangkuha ni Jarales sa iyang opisina kay alang sa mga pulis,lisod ma-aplikar ang ‘warrantless arrest’ kay wala sila nakakita sa sinugdan sa panghitabo.
Gipasabot ni City Police Director Col. Salvador Radam nga anaa sila sa lugar kay tuyo ipakalma ang sitwasyon ug dili mangdakop sa panig sa regular o interim management.
Siya miingon nga mahimong moduso’g kaso ang bisan kinsa sa duha ka panig pinaagi sa regular filing sa pikslaya.
Una niini,naglugwa sa hukom nga pabor ang korte sa prohibition case sa panig sa regular management diin gimanduan ang Local Water Utilities Administration o LWUA nga ihunong ang mga kalihukan sa interim officials.
Hisayrang human akusahi sa regular management ang grupo ni Jarales, misumbalik usab sila sa pag-ingon nga ang puwersa ni Najeal ang milungkab sa iyang opisina ug nanguha sa mga papeles sa miaging Abril 15.
