CAGAYAN DE ORO CITY – Direktang gihimakak sa liderato sa Police Regional Office 10 nga naglugwa sila’g pahayag nga gi-ambush sa wala maila nga motorcycle in tandem suspects ang kontrobersyal nga si Lapasan Baptist Church Bishop Dimver Andales nga unang biktima usab sa ”bad publicity” sa social media.
Kini human nag-imbento sa youtube content ang LIGHT HUB TV channel nga gi-ambush si Andales ug anaa sa kritikal nga kahimtang gumikan sa pag-ambus kaniya.
Miingon si PRO 10 spokesperson Police Maj. Joann Navarro nga dakong bakak ang impormasyon kay wala kini sukad naglugwa’g pahayag kabahin sa isyu ngadto sa pastor.
Dumduman nga nahimo usab nga unod sa social media si Andales kay dunay malisyoso nga facebook post nga nag-akusar kaniya nga sugar daddy sa usa ka kolehiyala kinsa nagsugo aron ipapatay ang MR.CAGAYAN DE ORO candidate nga si Adrian Fornillos sa 13th Street,Brgy Nazareth sa syudad niadtong Mayo ning tuiga.
Samtang dili palabyon ni Navarro ang utok sa LIGHT HUB TV youtube channel nga mihimo’g iresponsable nga social media posting kabahin sa gidangatan sa pastor ning syudad.
Miingon si Navarro nga gitaho na niya kini ngadto sa Youtube ug gipasubay sa PNP Regional Anti-Cybercrime Unit 10 aron ilhon ang responsable sa maong kremin.
Siya miingon nga moduso kini’g kasong kriminal batok sa mga tawo nga utok sa LIGHT HUB TV channel sa youtube.
Samtang sa pagkutlo usab ning balita,wala pa’y tubag nga gilugwa si Andales kon mohimo ba sa legal aksyon batok sa mga suspek.
