CAGAYAN DE ORO CITY – Gikuwestiyon ni kanhi City Mayor Oscar Moreno ang minilyong salapi nga gigamit sa giingong lapad nga vote buying sa mga kandidato ngadto sa mga botante sa Brgy Carmen sa brgy ug sk elections sa miaging adlaw’ng Lunes.
Kini human nabaniug nga anaa sa 6-mil pesos ang palit sa mga botante aron masiguro nga kadaugan sa mga kandidato nga anaa sa administrasyon kontra sa panig sa oposisyon.
Miingon ang kanhi mayor nga gingilngigan siya sa iyang nasayran sa kadako sa gibuhian pondo aron dili mailog gikan sa mga Uy ang pagdumala sa labing pinakadako nga brgy sa dakbayan.
Maoy nagkatigi pagka-brgy kapitan sila kanhi city vice mayor Rainer Joaquin ‘Kikang’ Uy ug bando sa negosyante nga si Agapito Suan Jr.
Sobra 6-mil botos lamang ang nakuha ni Suan itandi kang Kikang nga anaa sa kapin 29-mil botos ang nahuptan niini rason nga nahuptan ang 16-0 win sa piliay.
Apan nagtoo si City Mayor Rolando ‘Klarex’ Uy nga binuhatan sa ilang kaabtang sa politika ang naghinobrang pagpamalit sa boto ngadto sa mga botante kay hanas man sila misulti niini atubangan sa publiko.
Kini ang tubag sa mayor batok sa pagsaway nga giluwatan ni Moreno nunot sa nadungog nga anaa sa 6-mil pesos ang palit sa matag-botante aron modapig sa kandidatura sa iyang anak nga si Kikang.
Miingon si Uy nga kon unsa gani ang sayon isulti sa usa ka tawo,dili usab imposible nga kini mismo niyang binuhatan apan gipahid lamang ngadto sa uban.
Sa pikas bahin,dili masiak apan padayong suportahan sa partido Padayon Pilipino kon unsa man ang mga programa nga gipatuman ubos sa administrasyon ni Uy sa dakbayan.
Kini ang katin-awan ni Misamis Oriental District 2 Cong. Bambi Emano sa pangutana kon sinugdanan na ba ang managlahi nila nga gisuportahan sa pagka-kapitan sa Brgy Carmen aron mo-aslom ang maayong relasyong politika sa duha ka dagkong pamilya sa politiko dinhi sa syudad ug lalawigan.
Miingon si Emano nga wala sukad mihimo’g pagsupak ang ilang bando sa mga palisya ma-lokal man o nasyonal kon kini mohatag sa ikaayo sa katawhan sa dakbayan.
Pagklaro sa kongresista nga gitahod nila ang hukom sa katawhan sa Brgy Carmen nga si Kikang ug dili si Suan Jr ang gipadaog sa miaging piliay sa brgy.
