CAGAYAN DE ORO CITY – Gi-konsidera ni kanhi City Mayor Oscar Moreno nga dayag nga pagpanikas sa atubang sa katawhan ang giingong mani-obra nunot sa pagsaka sa ihap sa bag-ong mga botante sa Brgy Carmen ning syudad.
Kini ang rason nga gidasig niini si Cagayan de Oro 1st District Cong. Lordan Suan nga ipadayon ang imbestigasyon sa House Committee on Suffrage and Electoral Reforms diin napatawag si Carmen Punong Brgy Kikang Uy nga unang giakusahan sa Comelec-Manila nga nag-isyu sa libuang residence certificates sa mga residente nga dili taga-Brgy Carmen sa miaging registration period.
Miingon si Moreno kinsa kaatbang sa re-election campaign ni City Mayor Rolando ‘Klarex’ Uy nga dili angayang matugutan nga daw mawad-a’g bili ang ubang gagmay’ng kabarangayan sa distrito uno tungod sa maniobra sa kasamtangang administrasyon.
Samtang gipadumdom ni Mayor Klarex ngadto sa mga botante nga dili kalimtan ang daw pagpasagad sa pipila ka kanhing opisyales dihang miigo ang kagutom dala sa epekto sa COVID-19 kay kulang-kulang ang mga ayuda.
Gitumbok ni Uy ang tabang-pinansyal nga alang unta sa syudad apan gidala sa Misamis Oriental sa miaging 2022 elections.
Maoy gitumbok ni Mayor Klarex ang sobra 700 milyones pesos nga wala tanan nadawatan sa katawhang apektado sa COVID-19 ECQ declaration sa maong tuig.
Kini ang rason nga giawhag sa kasamtangang mayor ang katawhan nga makat-on na ug likayan nga mga kandidato nga nagpasagad sa ilang mga obligasyon sa panahon sa kalisdanan.
