CAGAYAN DE ORO CITY – Ensakto ang gihimo ni Cagayan de Oro 1st District Cong. Lordan Suan nga gidala niya sa hawanan sa kamarabaha ang isyu nga kuwestiyonableng pagsaka sa ihap sa mga botante sa Barangay Carmen ning syudad.
Kini ang reaksyon ni kanhi City Mayor Oscar Moreno sa batikos nga nadawatan ni Suan gikan sa kampo sa mag-amahang City Mayor Rolando ‘Klarex’ Uy Carmen Punong Brgy Kikang Uy kon nganong nadala sa nasudnong atensyon ang isyu sa rehistro sa maong brgy.
Miingon si Moreno nga trabaho kini ni Suan nga dad-on sa nasudnong han-ay aron masayod ang kamarabaha nga adunay naglihok nga problema sa rehistro dinhi sa syudad.
Siya miingon nga kon adunay basulon sa maong isyu, si Klarex kay una kining namulong nga kadtong gusto mahimong botante ug modawat sama sa milabay’ng barangay election, angay magpa-rehistro sa Brgy Carmen.
Alang kang Moreno nga klaro kini nga kasupakan sa balaod sa eleksyon diin nagamit ang buhatan ni Kikang pinaagi sa paglugwa sa barangay certifications sa voter registration applicants.
Hisayrang gitakdang mangatubang ang mag-amahang Klarex ug Kikang kuyog sa ilang mga abogado ingon man ang taga-Comelec 1st District Office sa kamarabaha kabahin sa maong isyu sa adlaw’ng Lunes.
