CAGAYAN DE ORO CITY – Gipaabot ni Vice Pres Sara Duterte ang iyang personal niya nga pasubo sa pamilya ug kaparyentehan sa namatay’ng sundalo nga nakahaya sa Brgy Culpan,Aloran,Misamis Occidental.
Kini luyo sa pagdumdom sa katawhan sa nasud sa ika-39 ka tuig nga anibersaryo sa EDSA People Power I Revolution nga paagi pagbugto sa 14 ka tuig nga balaod-militar nga gipatuman ni late President Ferdinand Marcos Sr kagahapong adlawa.
Natandog ug nahimong emosyonal ang pamilya ni late Army Cpl Rhovic Jun Boniao nga sa wala damha hilom sila gibisita sa ikaduhang pinakataas nga lider sa nasud aron duyugan sa mubo nga higayon sa ilang pagbangutan.
Si Boniao ang tipik sa mga sundalo nga wala bulugi sa higayon dihang gika-engkuwentro nila ang pipila ka sakop sa New People’s Army sa Oriental Mindoro sa milabay’ng semana.
Hinoon,dili kini bag-o nga gimbuhaton ni VP Sara kay sa nagsilbi pa kining alkalde sa Davao City,nabatasan na niini ang susama nga kalihukan.
Susama sa ilang amahan nga si kanhi Pres Rodrigo Duterte,duol usab kang VP Sara ang tropa sa gobierno sanglit dako kining supak sa kalihukang insurhensiya nga mugna sa CPP-NPA.
Hisayrang sa wala pa nagbugto ang relasyong-politika nila ni Pres Bongbong Marcos, nagsilbi nga vice chairman si VP Sara sa National Task Force to End Local Communist Armed Conflict o NTF-ELCAC nga giinita’g mayo sa CPP-NPA tungod sa epektibo nga pagtubag niini sa sulirang insurhensiya sa kabaryuhan.
