CAGAYAN DE ORO CITY – Nakuratan bisan ang pipila ka sektor naglakip sa legal profession sa dakbayan kabahin sa gibulgar ni Vice Pres Sara Duterte batok sa liderato ni Pres Bongbong Marcos nga naglakip kang First Lady Liza Marcos ug House Speaker Martin Romualdez.
Kini human akusahi ni VP Sara ang first lady nga nagsugo kaniya nga mopasulod sa binilyong salapi sa DepEd kay aron maadto sa gi-indorsong tawo sa Malakanyang sa miaging katuigan.
Wala magmahay si Romualdez kay nabulgar usab nga utangan kini sa mga Duterte ingon man giingong nalambigit sa pagpanuhol sa korte suprema ug ubang illegal nga kalihukan ubos sa Marcos administration.
Miingon si Atty. Antonio Soriano, convenor sa Citizens Watch for Good Governance 10 nga seryoso ang maong mga alegasyon nga gipabuto ni Sara epekto sa iyang grabeng kasuko na sa pag-ipit kaniya sa kamarabaha.
Kini ang rason nga angay nang molihok si Marcos aron manduan si Romualdez nga ihunong na ang hearing sa quadcom kay dili na in aid of legislation apan paglutos na sa mga Duterte ang gipanghimo sa mga kongresita.
Samtang nagtoo si kanhi IBP-Misamis Oriental chapter president Atty Eddie Cuaresma nga wala lang nag-sentro ang isyu sa kurapsyon kang Duterte apan mismo kang Romualdez.
Kini human gituyo’g lusad ang imbestigasyon sa komitiba sa good government and accountability aron utingkayon ang paggasto sa Office of the Vice President gamit ang confidential funds.
Miingon si Cuaresma nga lehitimo kini nga isyu nga unta wala likayi ni VP Sara apan gihataga’g katin-awan.
Apan subay sa balaod, bugtong Commission on Audit lang ang makahupot sa fund liquidation gikan sa mga buhatan nga nagbaton sa intelligence ug confidential funds.
