CAGAYAN DE ORO CITY – Gikabalaka sa kanhi three-term congressman nga si former Cagayan de Oro City Mayor Constantino ‘Tennix’ Jaraula nga modangop ang pipila ka kongresista sa hukmanan o korte aron direkta nang isumbong si Vice Pres Sara Duterte.
Kini human gi-remand o gipabalik sa 18 ka senator judges nga naglakip kang Senate President Chiz Escudero ang articles of impeachment sa kamarabaha nga maoy nagpasaka batok VP Sara sa senado.
Miingon si Jaraula kinsa makapila ka higayon nga giila nga outstanding congressman sa miaging mga kongreso nga dili kini makiangayon ug sukwahi sa unod sa balaod sa nasud.
Siya miingon nga sa gihimong pagparebyo’g balik sa mga kongresista sa mga sumbong batok VP Sara,dayag nga nasaksihan sa katawhan ang duha ka panig sa mga senador.
Kini naglakip sa mga senador nga pabor kang Inday Sara nga maluwas batok impeachment case ug kadtong mga nanghingusog nga mapapha siya sa katungdanan.
Gihinaut ni Jaraula nga unta iampo sa katawhan nga malamdagan ang mga huna-huna sa mga magbabalaod kabahin sa kahimtang-politikal sa nasud.
Nagsumikad ang impeachment complaint batok Sara sa gipamugos nga isyu sa confidential ug intelligence funds sa iyang opisina ingon man Department of Education diin hinatag ni Pres Bongbong Marcos nga kuwestiyonabli usab nga lakang kay walay pagtugot sa balaod.
Dumduman nga gitoohan sa solid political supporters sa kanhi administrasyon nga mani-obra kini dili lang sa Malakanyang ug mga alyansa nila sa kongreso apan bisan sa ubang puwersa nga nagtinguha pagpanas sa mga Duterte sa kasaysayan sa nasud.
Hisayrang gawas kang VP Sara nga gikasuha’g criminal ug gisang-atan sa impeachment complaint sa Kamarabaha, gitugyan usab sa liderato ni Marcos sa kustodiya sa International Criminal Court si kanhi Pres Rodrigo Duterte sa isyu sa crimes against humanity case.
