Dinalian nga gipahimangnoan karon ang publiko sa Amihanang Mindanao nga likayan una ang paggawas sa panimalay aron dili direktang maapektohan sa nagpabilin nga hugaw nga hangin ug haze.
Gipahayag ni Environmental and Occupational Health Office Medical Officer III Dr. Andrea Nicole Sugapong nga kinahanglang magsul-ob og N95 o surgical mask, o mogamit og basang panyo ang mga lungsuranon kon dili gayud malikayan ang paggawas sa balay.
Gitin-aw usab sa opisyal nga angay sirad-an ang mga bintana sa panimalay ug likayan ang dugay nga pagpabilin sa gawas labi na sa mga bata, tiguwang, ug mga mabdos.
Labaw sa tanan, gitambag sa kagamhanan ang pag-inom sa daghang tubig ug ang dinalian nga pag-adto sa pinakaduol nga ospital kon mosamot ang gibating kalisod sa pagginhawa.
