CAGAYAN DE ORO CITY, Philippines – Gi-awhag sa Department of Health (DOH) ang publiko nga mag-igmat batok sa mga sakit nga makuha sa pagsulod sa ting-init ug panahon sa pagbubo sa kusog nga ulan.
Kagahapon, gipagawas sa ahensya sa nga pagsaka sa kaso sa W-I-L-D Diseases.
Kini nga sakit gilangkoban sa “water and food borne diseases”, Influenza like illness, Leptospirosis ug Dengue.
Proper hygiene sama sa pagkaligo matag adlaw, paglimpyo sa palibot sa balay ilabe sa kusina ug banyo, ug insakto nga pagluto sa pagkaon ang gikampanya sa ahensya aron makalikay sa mga sakit nga nagsumikad sa hugaw nga tubig.
Subay sa data ang influenza-like illnesses (ILI) mitakla sa 5,150 ka kaso sugod Enero 5 hangtud 18, ug nadobli niini ang gidaghanon sa kaso itande sa 2,398 sa miaging Disyembre 22 hangtud Enero 4.
Misaka sa 8% nga usbaw ang ihap sa kaso sa Leptospirois dihang miabot na sa 422 ang reported cases sa Pebrero 1, itande sa 329 ka kaso sa susamang bulan sa tuig 2024.
Maoy gika-alarma sa DOH ang 40% nga pagsaka sa kaso sa dengue kundiin 28,234 na ang ihap sa mga tawong naigo sa maong sakit sugod Enero 1 hangtud Pebrero.
Hinoon, mikunhod ang ihap sa mga tawong namatay gumikan sa dengue sa 0.35% itande sa 0.42% sa miaging tuig.
Gi-enkorahe sa mga doktor ang mga ginikanan nga ibatasan ang paglimpyo sa kanal, ilabog ang sudlanan nga pwede puy-an o breeding site sa lamok nga gadala’g dengue, ug mag-apply sa lotion nga mu-alkontra sa pagpamaak sa lamok.
Gitin-aw sa DOH nga kung dunay mga sintomas gikan sa W-I-L-D disease mahimong mudool gilayon sa labing dool nga health center aron maalibyuhan ang sintomas ug dili na mokomplikar.
