CAGAYAN DE ORO CITY – Gisaway sa grupong Amihan ug Bantay Bigas ang gihinambog sa Dept of Agriculture nga pakighiusa sa Department of Labor and Employement o DOLE aron maapil makapali sa P20 nga kilo sa bugas ang working class o minimum wage earners sa nasud.
Kini human unang naka-sentro lang sa limitado nga mga sector ang pagpatuman sa P20 rice program ug wala nalakip niini ang dakong ihap sa populasyon sa nasud.
Miingon si Cathy Estavillo sa maong grupo nga ‘band aid’ solution lamang sa kanunay ang kagahimo sa gobierno batok sa naghinobrang kalisod sa katawhan.
Siya miingon nga laing kapalpakan na usab kini nga gitabunan sa administrasyon ni Pres Bongbong Marcos aron dili tulisukon sa katawhan.
Una usab niini,gihagit ni Marcos ang iyang mga kritiko nga hulaton ang katibuk-ang resulta sa P20 rice program hangtod sa Mayo 2028.
