Nagatoo si Atty. Kaloi Zarate, former Bayan Muna representative, nga ang husto nga pagtaas sa sweldo sa mga mamumuo mahimong makapahimsog ug makapasaka sa ilang produktibidad sa trabaho.
Sa interbyu ni Zarate sa Bombo Radyo, iyang giingon nga bisan pa og adunay kabalaka nga mosaka ang gasto sa mga korporasyon, dili kini pasabot nga mapurdoy sila kay mabawi ra kini pinaagi sa mas taas nga output sa mga mamumuo.
Dugang pa niya, ang mas maayong suhol makadasig sa mga trabahante nga mas episyente ug determinado sa ilang adlaw-adlaw nga trabaho.
Giingon usab niya nga base sa miaging mga kasinatian, ang pagtaas sa sweldo nakatabang na sa pagpausbaw sa labor productivity sa nasud.
Busa, alang kang Zarate, ang wage increase usa ka pamuhunan sa kusog ug kalig-on sa ekonomiya pinaagi sa mas produktibong pwersa sa mamumuo.
