“Konswelo de bobo lang” mao kini ang komento ni Federation of Free Workers (FFW) legal counsel Atty. Proculo Sarmen sa ipatuman nga ikaduhang tranche sa Wage Order No. 24 sa rehiyon karong adlawa, nga magdala sa minimum wage ngadto sa ₱500 alang sa mga mamumuo sa Northern Mindanao.
Matod ni Sarmen, dili igo ang maong kantidad aron matubag ang nagkataas nga gasto sa panginabuhi sa mga pamilya karon.
Dugang pa niya, bisan pa og adunay wage adjustment, nagpabilin gihapon nga ubos ang lebel sa suhol kon itandi sa tinuod nga panginahanglan sa mga empleyado.
Busa, dili na katingalahan kung nganong pilion sa pipila ang pag‑abroad kaysa mag‑antos sa pasweldo sa Pilipinas. Giingon usab niya nga mas naglisod ang labor sector tungod sa contractualization ug outsourcing nga nagapahuyang sa seguridad sa trabaho.
Maong nanawagan karon ang labor sector sa mas lig‑on nga pagrepaso ug pagtan‑aw sa Department of Labor aron masiguro nga ang wage increase nga ipatuman dili lang simboliko, kondili tinuod nga makapahupay sa kahimtang sa mga mamumuo.
