Wala bag-ong kaso sa Nipah Virus sa Pilipinas, gawas niadtong 2014 nga natala sa Sultan Kudarat. Kini ang gikompirmar ni Dra Jennifer Cagadas, sa Northern Mindanao Medical Center (NMMC) tungod kay kini nga klase sa bayrus dala sa mga “bats” gikan sa nasud sa India.
Hinoon, bisan wala pay kaso nga nakasulod sa nasud, nagpanagana na daan ang Department of Health kuyog ang Bureau of Quarantine nga bantayan ang mga tugpahanan, ug pantalan sa posibleng pagsulod sa nagdala sa bayrus.
Ang Nipah, segun ni Dr Cagadas, nagsumikad sa mga pagkaon nga nakontaminar sa mga kwaknit nga makaon sa tawo, ug pwede mutakod sa laing tawo, gikan sa “sharing of foods”.
Makatakod usab ang tawo nga carrier sa Nipah sa mananap nga ilang hatagan sa ilang gisima o kontaminadong pagkaon. Kini maoy nakapadelikado sa maong sakit.
Ang sintomas sa Nipah ang flu-like symptoms sama sa hilanat, grabe nga pagsakit sa ulo, pagkahilo, kaluya, pagsakit sa tutunlan o tila-ok, pagsakit sa kalutahan o joints, pasmado nga kaunuran, ug kung mugrabe mahimong magkombulsyon ang tawo ug mawad-an sa panimoot.
