Walay kalainan ug walay exempted sa gugma sa Dios, kini ang gitin-aw ni Bishop Joseph Lagumbay sa Catholic Universalist Church of Asia Pacific sa higutanang pagsaulog sa Pride Month sa mga miyembro sa LGBT community.
Gipasalig sa obispo nga walay sayop sa pagbuhat sa Ginoo sa mga tawo ug nasayod na ang Labawng Makagagahom sa tanan nilang pagkatawo pa lang sa sabakan sa inahan.
Dugang pa niya, dili ang pagkabayot o pagkatumboy ang isyu kundili ang mga malisyosong buhat sama sa pagpalingla, pag-abusar, ug pag-exploit sa sekswalidad.
Giklaro usab sa lider sa simbahan nga ang matag miyembro sa LGBT gipakamatyan gihapon ni Kristo, busa ang tanan kinahanglan nga isipon nga sakop sa Iyang gugma.
Sa katapusan, giingon ni Bishop Lagumbay nga bisan ang mga hayop sa kinaiyahan nagpakita og susamang kinaiya, hinungdan nga kini usa ka misteryo sa kinabuhi nga angay sabtan sa mas lawom nga paagi.
