CAGAYAN DE ORO CITY – Walay nakit-an nga sinyales nga dunay foul play ang kapolisan sa nakit-ang patay’ng lawas sa nursing student nga babaye nga tinun-an sa Saint Michael’s College sa kadagatang sakp sa Purok 14,Poblacion,Manticao, Misamis Oriental.
Kini human kompirmaha sa Manticao Police Station nga naila ang biktima nga si Chloe Suzene Villaester,24 anyos nga lumad taga-Kolambugan,Lanao del Norte.
Sa pasiunang imbestigasyon, nakit-an sa mananagat nga si Perlan Ramirez ang naglutaw-lutaw nga lawas sa biktima hinungdang paspas kini giguyod sa lapyahan.
Gidala pa kini sa ospital apan deklarado nang patay sa mga doctor nga nag-atiman niini.
Adunay nagsulti nga ang biktima unang milukso sa tulay sa Iligan City ug na missing sa pipila ka adlaw rason nga nakit-an kini nga wala na’y kinabuhi kaganihang buntag.
Gitoohan nga ang pagkalumos niini ang rason nganong nakabsan sa kinabuhi diin kasamtangang gikustodiya sa punerarya sa Manticao.
