Walay kontrol ang lokal nga komunidad sa mga kalihokan nga may kalabotan sa Enhanced Defense Cooperation Agreement (EDCA) sites ilabina sa Lumbia Airport, matod sa anti-war advocate nga si Ben Tui Contreras.
Sa interbyu sa Bombo Radyo, giingon ni Contreras nga adunay mga impormasyon nga nag-abot na sa lugar ang pipila ka United States Armed Forces aron magpahigayon og training nga may kalabotan sa ilang operasyon.
Matud pa niya nga ang maong training giingong kabahin sa pag-andam sa mga sundalo nga posible pang i-deploy human sa ilang training period.
Gipasabot ni Contreras nga kon unsay desisyon sa Estados Unidos ug sa national government, kasagaran wala nay mahimo ang lokal nga komunidad tungod kay sakop kini sa kasabotan tali sa duha ka nasud.
Dugang pa niya nga adunay mga kondisyon sa maong kasabotan nga dili kaayo klaro sa publiko ug posible nga limitado lamang ang impormasyon nga nahibal-an sa katawhan.
Tungod niini, nagpahayag siya og kabalaka sa posibleng epekto sa presensya sa foreign troops sa nasud ilabina sa mga lugar nga nalambigit sa EDCA sites. (By James Oliver)
